СЎНГГИ ПУШАЙМОНЛИК

Аёл — мукаррам зот. Улар ҳақида таърифу ташбеҳ бисёр. Бироқ гуруч курмаксиз бўлмаганидек, хотин-қизлар орасида ҳам жиноят кўчасига кириб қолаётганларнинг борлиги ғоят ачинарли.

Сожида Муродова (исм-шарифлар ўз­гартирилди) маҳалла фуқаролар йиғини раисининг ои­ла, хотин-қизлар ва иж­­тимоий, маънавий масалалар бўйича ўринбосари лавозимига сайланганда маҳалладошлари аёлларнинг яқин кў­мак­до­ши бўлади, деб ўй­лашган эди. Афсуски, улар янг­лишган экан.

Гап шундаки, С. Муродова ўт­кинчи ҳою-ҳавасга берилиб, нафс қутқусига учди. Аниқроқ айтадиган бўлсак, маҳалладоши Санобар Боймирзаевани алдов йўли билан ишончини суиистеъмол қи­­либ, чув туширишига бир баҳя­ қолди.

Кунларнинг бирида у ҳузурига иш юзасидан келган Санобарнинг кўнглига қўл солди:

— Санобар опа, маҳаллада қу­рилаётган икки хонали арзон ба­ҳодаги уйлардан оламан, деб юрганингиздан хабарим бор. Келинг, сизга бир яхшилик қилай. Сизга ўхшаган бир-икки нафар аёлга таниш-билишларим орқали уй олиб берганман. Сиз озгина харажатидан қочмасангиз бўлди…

— Агар шундай қилсангиз, бу яхшилигингизни бир умр унут­мас­ эдим. Яшаш шароитимни ўзингиз яхши би­ла­сиз, икки болам билан жу­да қийналиб юрибман. Хўш, харажати қанча бў­лади?

— 500 АҚШ доллари олиб кел­­сангиз, мен бу ишга киришаман. Тез орада уй-жойли бўлиб қоласиз.

Бу гапни эшитган Санобарнинг бо­ши қотди. «Бу пулни қаердан топаман? — деб ўй­лади. — Ўзи шундоғам амал-та­қал қилиб рўз­ғор тебратиб келаётган бўл­сам».

— Сингилжон, шуни озгина камайтирсангиз бўлмайдими? Аҳ­волимни биласизку, — де­ди у Сожидага ялинган кў­йи.

— Хўп, майли, 200 АҚШ долларини ўтдим. Доллар ўрнига 3 миллион сўм берсангиз ҳам бўлади. Бу ёғини ўзим гаплашиб, «катта»ларни кўн­ди­рарман.

Шу куни пулни олиб ке­лишига рози бўл­­ган Санобар яқинларидан, таниш-билишларидан қарз сўради. Аммо 3 миллион сўм ҳеч қаердан топилмади.

Бу орада Сожида деярли ҳар ку­ни қўн­­­­ғироқ қилиб, пулни сў­раб­ ҳоли-жонига қўймади. Уни «ваъдабоз, ёл­ғон­чи»­га чиқариб қў­йишдан ҳам тоймади.

Маломатлардан сабр косаси тўлган аёл ҳуқуқ-тартибот идораларига мурожаат қи­лишга мажбур бўлди.

Тегишли идоралар С. Боймирзаеванинг шикоятига асосан тезкор тадбир ўтказди.

Текин даромад орттириш пайи­да бўлган Сожида Муродова «келишилган» маблағни Санобар Боймирзаевадан олаётган пайтда жи­ноят­ устида қўлга олинди.

Суриштирув ва тергов чоғида С. Муродова сувдан қуруқ чи­қиб кетиш илинжида турли баҳоналарни рўкач қи­либ, «мен Санобар опадан 3 миллион сўм қарз сўраган эдим», дея ўзи­ни оқлашга уринди. Аммо тўп­ланган далил ва кўр­сатмалар унинг асл муддаосини фош қил­ди. Суд судланувчи С. Муродованинг жиноий қилмишларини муҳокама этиб, унга нисбатан қонуний жазо тайинлади.

Фирибгарлик ва товламачиликнинг умри қисқа. Афсуски, С. Муродова сингари кимсалар бу ҳақи­қатни ўз вақтида англаб етмайди. Сўнгги пушаймонликдан эса, фойда йўқ.

Икромжон ШАЙМАНОВ,

жиноят ишлари бўйича

Термиз шаҳар суди раиси,

Абдунаби БОБОЁРОВ,

журналист