ҚОРА НИЯТ
Самарқандлик Гулсора Жонқобилова (исм-шарифлар ўзгартирилган) қизи Ноила хорижга ишга кетгач, икки набираси билан уйда қолди. Соғлиғи яхши эмаслиги сабабли аёл уй-рўзғор юмушларига қийнала бошлади. Қолаверса, набиралари Моҳичеҳра билан Олтинойга ҳам қарашнинг ўзи бўлмайди. Шу боис жияни Зебони ёрдамга чақирди. Зебо чаққон дастёрга айланди.
![](https://old.sud.uz/wp-content/uploads/2022/02/11-1024x683.jpg)
Шу зайлда осуда турмуш кечираётган оиланинг кутилмаганда ҳаловати бузилди. Ўтган йилнинг 12 феврал куни Моҳичеҳра ва Олтиной мактабга кетишганди. Г. Жонқобилованинг уйи кўп қаватли уйнинг биринчи қаватида жойлашган ҳамда томорқа майдони тарафидан ҳам уйга кириш эшиги очилган бўлиб, Зебо уйнинг ҳавосини алмаштириш мақсадида ана шу эшикни очиб қўйган эди.
Гулсора Жонқобилова меҳмонхона томонга ўтганда боши ва юзига қора ниқоб тақиб олган нотаниш кимсага кўзи тушди. Шу пайт айвондан яна ниқобли икки киши чиқиб келди.
— Кимсизлар? — деди Г. Жонқобилова чақирилмаган «меҳмонлар»га қарата. — Нима сабабдан уйга кирдингиз?
Бунга жавобан улардан бири аёлнинг юзига зарб билан мушт туширди. У кутилмаган зарбдан ерга йиқилгач, босқинчилар ундан сейфнинг калитини топиб беришни талаб қилишди. Бироқ уй эгаси тез орада ҳушидан кетди.
Босқинчилар шовқин-суронни эшитиб, қўшни хонадан чиқиб келган Зебони ҳам уриб, ҳаммомга олиб киришди. Сўнгра чилвир билан унинг оёқ-қўлларини боғлаб, сейфнинг калитини топиб беришни сўрашди.
— Бу уйга яқинда келганман, — дея жавоб беради қиз қўрқувдан титраганча. — Сейфнинг калити қаерда туришини билмайман.
Босқинчилар оёқ-қўли боғланган Зебони ҳаммомда қолдириб, эшикни ёпиб қўйишди. Шундан сўнг темир сейф калитини қидиришга тушишди. Ниҳоят, улар Г. Жонқобилованинг ҳамёнида турган сейф калитини топиб, сейфда сақланаётган 44 минг 500 АҚШ доллари, юз евро, умумий баҳоси 3 минг 800 АҚШ доллари бўлган етти хил турдаги тақинчоқлар, умумий баҳоси 2 минг 700 АҚШ доллари бўлган икки дона планшет ва бир дона уяли телефон аппаратини олиб кетишди.
Хўш, жиноятни ким содир этган? Г. Жонқобилованинг уйида бунча миқдорда пул борлиги-ю, унинг хонадонига кириш йўлини ким билган?
Изқуварлар олдида ана шу каби саволлар кўндаланг турарди.
Суриштирувлар натижасида калаванинг учи Шеҳруз Шоҳназаровга бориб тақалди. Гап шундаки, Шеҳрузнинг акаси Облоқул бир пайтлар Г. Жонқобилованинг қизига уйланган бўлиб, кейинчалик улар ажрашиб кетган. Акасининг собиқ қайнонасиникида катта миқдорда пул борлиги, уйга қандай кириш мумкинлигини Шеҳруз яхши биларди.
Шу ўринда жиноят сабабига тўхталадиган бўлсак, содир этган жинояти учун суд томонидан тайинланган жазони Пастдарғом туманидаги манзил колониясида ўтаётган Шеҳруз Зуфар Иззатуллаев деган кимса билан танишиб, яқин бўлиб олади.
Бир куни Шеҳруз Зуфарга Г. Жонқобилованинг уйида катта миқдорда пул борлигини айтади. Бу хабар осон пул топишга мойил кимсаларнинг хаёлини бузади. Улар Г. Жонқобилованинг пулини қўлга киритишни ўйлай бошлашади. Бу ишга Жамшид Рамазонов ва қидирувда бўлган Носир Остоноқуловни ҳам жалб этишади.
Тузилган жиноий режага мувофиқ улар босқинчилик йўли билан Г. Жонқобилованинг уйига кириб, пул ва моддий бойликларни қўлга киритишади. Ўлжа эса, ўзаро келишув асосида тақсимланади.
Амалдаги Жиноят кодексининг 164-моддаси 4-қисми «а» бандида назарда тутилган босқинчилик, яъни бир гуруҳ шахслар томонидан олдиндан тил бириктириб, уй-жойга ғайриқонуний равишда кирган ҳолда ўзганинг жуда кўп миқдордаги мол-мулкини талон-торож қилиш мақсадида ҳужум қилиб, ҳаёт ёки соғлиқ учун хавфли бўлган зўрлик ишлатиш ва шундай зўрлик ишлатиш билан қўрқитишда ифодаланган жиноий ҳаракатларни содир этган кимсаларга суд ҳукми чиқарилди. Суд З. Иззатуллаев ва Ш. Шоҳназаровга муқаддам тайинланган ҳукм бўйича ўталмай қолган жазосини қисман қўшиш йўли билан узил-кесил ўташ учун 15 йил 2 ой муддатга озодликдан маҳрум қилиш жазосини тайинлади. Бундан ташқари улар ўта хавфли рецидивист деб топилди. Ж. Рамазонов ҳам умрининг 12 йилини темир панжара ортида ўтказадиган бўлди. Н. Остоноқуловга нисбатан қўзғатилган жиноят иши алоҳида ажратилиб, қўшимча суриштирув ва тергов ишлари олиб борилмоқда.
Қора ниятли кимсаларнинг қабиҳ қилмишлари ана шундай якунланди.
Улар энди бировнинг ҳақи бошқага ҳеч қачон буюрмаслигини англаб етишса, ажаб эмас.
Фаррух САМАТОВ,
жиноят ишлари бўйича
Нуробод тумани суди раиси,
Абдуҳамид ХУДОЙБЕРДИЕВ,
журналист
Фикр қолдириш